3 гыйнварда Болгар музей-тыюлыгында «Болгар шәһәрендә ЗимаFest» кышкы фестивале кысаларында беренче бәйрәм чарасы узды.
Яңа ел чыршысы янында кунакларны Кыш Бабай һәм Кар кызы, шулай ук тарихи персонажлар-Петр I, Екатерина II каршы алды. Концерт номерлары белән иҗат коллективлары чыгышлары күрсәтелде. Күңелле җырлар яңгырады, дәртле биюләр башкарылды. Традицион кышкы уеннар һәм спорт-уен конкурсларыннан башка да булмады.
Үз куллары белән нәрсәдер ясарга яратучылар өчен мастер-класслар эшләде, анда осталар яңа ел сувениры ясау серләре белән уртаклаштылар. Кунаклар яңа ел костюмнары конкурсында катнаштылар, анда иң оригиналь һәм креатив образлар призлар белән билгеләнде.
«Чай да коймак» гастрономия мәйданчыгында барысы да яңа пешкән утын миченнән коймак һәм җылы чәй белән сыйланды.
Иң якты мизгелләрне кунаклар тематик фотозонада төшерделәр.
Бәйрәм көне җылы, күңелле һәм җанлы аралашу атмосферасында узды!
Чарада Болгар шәһәре һәм Спас районының 500дән артык кешесе һәм кунаклары катнашты.