«Күрше» республика фестиваленең кышкы сезон проектлары конкурсы нәтиҗәләре билгеле булды. Эксперт бәяләве нәтиҗәләре буенча күпсанлы гаризалардан 49 финалист сайлап алынды. Алар исәбенә Болгар музей-тыюлыгы тарафыннан «Спас районының социаль иминлеге» Хәйрия фонды белән берлектә тәкъдим ителгән «Болгар шәһәрендә fest кышы» проекты да кергән.
Проект кысаларында Болгарның иҗтимагый һәм ишегалды территорияләрендә өч бәйрәм чарасы оештыру планлаштырыла. Программаның детальләре вакыйгалар узу даталарына якынрак игълан ителәчәк.
Фестиваль Татарстан Республикасы Рәисе ярдәме белән үткәрелә. Фестивальнең яңа сезонының үзенчәлеге приз фондының ике тапкырга артуы булды — хәзер ул 40 миллион сум тәшкил итә. Сайлап алынган проектларны гамәлгә ашыру 20 декабрьдән соң башланачак.