Спас районында Бөтендөнья татар конгрессы вәкилләре эш визиты белән булды. Делегацияне Башкарма комитет җитәкчесе урынбасары – Татарстан бүлекчәләре белән эшләү комитеты җитәкчесе Ирек Шәрипов җитәкләде. Визит программасы бай булды һәм берьюлы берничә мөһим темага кагылды.
Килүнең төп максаты «Татарлар: үз өемдә – үз көем» радиотапшыруын яздыру һәм Конгрессның җирле бүлеге активистлары белән очрашу булды. Бөтендөнья татар конгрессы ДТРК белән бергә гамәлгә ашыра торган проект республиканың төрле почмакларында яшәүче татарларның тормышы турында сөйләргә мөмкинлек бирә.
Спас районы башлыгы Роман Исланов районның Татарстан тормышындагы урыны, аның икътисады, демографиясе һәм киләчәккә планнары турында сөйләде.
Милли мәгариф, халык мәдәнияте һәм дини тормыш турында аерым сөйләштеләр. Район үсешенә өлеш кертүче җирле активистлар да үз тарихлары белән уртаклашты.
Шәһәр мәдәният сараенда Бөтендөнья татар конгрессы идарәсенең түгәрәк өстәл — утырышы узды. Проблемалар һәм киләчәккә планнар турында фикер алыштык.
Болгар музей-тыюлыгының «Музей урамы» бүлеге мөдире Г.Ю. Сәгыйрова «Болгар татар халкы традицияләрен саклаучы» дигән доклад белән чыгыш ясады һәм татар халкының телен, мәдәниятен үстерүдә, гореф-гадәтләрен һәм саклауда зур хезмәтләре өчен рәхмәт хаты белән бүләкләнде.