2022 елның 8 апрелендә Болгар цивилизациясе музееның күргәзмә мәйданчыгында «Иҗат тукталган мизгел» күргәзмәсе ачылды. Күргәзмә Россия рәссамнар берлеге әгъзасы Шәрипов Хәмзә Мәүлихан улының юбилеена багышлана. Күргәзмәдә килүчеләр игътибарына Болгар музей-тыюлыгы фондларыннан рәссам эшләре тәкъдим ителде. Хәмзә Шәриповның картиналарының характерлы үзенчәлеге булып, борынгы архетик образлар символикасына һәм халык примитивы сәнгате традицияләренә таянып, лаконич формада чагылдырылган фәлсәфи эчтәлеге тора. Хәмзә Шәриповның теманы пластик хәл итүнең үз принциплары бар: яссылык фоны, образлар саны чикләнгән, минимум детальләр. Традицион халык символларын куллану: ярымай, манара, күл, кояш, тәгәрмәч, чәчәкләр. Картинадагы кешеләр сыннары шартлы рәвештә, схематик рәвештә бирелгән. Хәмзә Шәриповның картиналары аерым лирик кәеф тудыра. Күргәзмәне ачуда Болгар балалар сәнгать мәктәбе укучылары катнашты.
Күргәзмә 2022 елның 12 маена кадәр дәвам итәчәк.

Социаль челтәрләрдә уртаклашу